Yn ddiweddar, fe wnaeth Darren Millar, AS Gorllewin Clwyd ac Arweinydd y Ceidwadwyr Cymreig, a Gareth Davies, AS Dyffryn Clwyd, ymweld ag EvadX Limited, cwmni saernïo dur sydd wedi hen sefydlu ym Mae Cinmel, i drafod cynlluniau ehangu'r cwmni a'i fuddsoddiad parhaus mewn technoleg newydd.

Sefydlwyd EvadX ddechrau'r 1980au ac mae wedi tyfu'n gyson ers hynny a bellach yn cyflogi 43 o staff. Mae’n buddsoddi mewn offer uwch-dechnoleg gyda systemau modelu 3D arloesol, peiriannau CNC a systemau echdynnu mwg, gan sicrhau cynnyrch o'r radd flaenaf ar gyfer prosiectau mawr ledled y DU, gan gynnwys ym Manceinion a Llundain.

Yn ystod yr ymweliad, cyfarfu’r Aelodau o'r Senedd â Simon Adams, Rheolwr Gyfarwyddwr, Beth Griffin, Cyfarwyddwr Gweithrediadau, a Robert Evans, Cyfarwyddwr Cynhyrchu, a rannodd fanylion am wythnos waith pedwar diwrnod arloesol y cwmni, polisi sydd wedi profi'n boblogaidd gyda staff ac sydd wedi helpu i ddenu recriwtiaid newydd mewn marchnad beirianneg gystadleuol.

Bu Mr Millar a Mr Davies yn trafod eu cefnogaeth i gam nesaf twf EvadX, gan helpu i gryfhau economi gweithgynhyrchu a pheirianneg y Gogledd.

Yn dilyn y cyfarfod, dywedodd Darren Millar, AS Gorllewin Clwyd ac Arweinydd y Ceidwadwyr Cymreig: 

“Roedd hi'n wych cael cwrdd â thîm EvadX a gweld enghraifft mor drawiadol o gwmni o’r Gogledd Cymru sy'n buddsoddi, yn arloesi ac yn ffynnu.

"Mae'r sector gweithgynhyrchu yn bwysig i'n heconomi ranbarthol ac mae cwmnïau fel EvadX yn dangos y sgil, yr ansawdd a'r uchelgais sy'n gwneud y Gogledd yn lle gwych i wneud busnes.

“Mae'r cwmni’n cyfuno degawdau o brofiad gyda buddsoddiad blaengar mewn pobl a thechnoleg, ac mae'n hanfodol ein bod yn cadw ac ehangu'r sgiliau hyn yn ein hardal, felly rwy'n falch bod EvadX yn bwriadu datblygu mwy fyth a chreu mwy o swyddi lleol a fydd yn hwb gwirioneddol i Fae Cinmel a'r rhanbarth ehangach.

“Mae'n rhaid i Lywodraeth Cymru sicrhau nad yw busnesau fel hyn yn cael eu rhwystro gan drethi uchel a’u bod yn gallu cael gafael ar y buddsoddiad sydd ei angen arnynt i dyfu.”

Ychwanegodd Gareth Davies, AS Dyffryn Clwyd:

“Roedd hi'n bleser ymweld ag EvadX a gweld busnes lleol sy'n ffynnu, yn tyfu ac yn arwain y ffordd yn y Gogledd. Mae'r sector gweithgynhyrchu yn gwbl hanfodol i economi'r Gogledd, gan ddarparu swyddi crefftus â chyflog da a chefnogi'r genhedlaeth nesaf o beirianwyr a gwneuthurwyr.

“Yr hyn sy'n sefyll allan i mi oedd dull blaengar y cwmni, yn enwedig yr wythnos waith pedwar diwrnod, sy'n amlwg wedi bod yn llwyddiannus o ran hybu morâl a chynhyrchiant staff.

“Mae cynlluniau EvadX i ehangu a chreu swyddi newydd yn newyddion cadarnhaol iawn i'n rhanbarth. Mae angen i ni wneud yn siŵr bod busnesau fel hyn yn gallu cael gafael ar y cymorth a'r cyllid grant cywir gan Lywodraeth Cymru er mwyn parhau i dyfu, buddsoddi a chryfhau economi'r Gogledd."

Wrth sôn am yr ymweliad, dywedodd Simon Adams, Rheolwr Gyfarwyddwr EvadX, Beth Griffin, Cyfarwyddwr Gweithrediadau, a Robert Evans, Cyfarwyddwr Cynhyrchu:

“Roedden ni’n falch iawn o groesawu Darren Millar AS a Gareth Davies AS i EvadX a rhannu ein gweledigaeth ar gyfer y cam nesaf. Wrth i ni nodi 41 mlynedd mewn busnes, rydyn ni’n dal i fod yn falch iawn o'n pobl - mae eu sgil, eu hymroddiad a'u gwaith tîm wedi ysgogi ein llwyddiant ac yn parhau i siapio ein dyfodol.

“Mae llawer o gwmnïau bellach yn archwilio wythnos waith pedwar diwrnod, ond fe wnaethon ni ei fabwysiadu tua 15 mlynedd yn ôl. Mae wedi dod yn rhan annatod o'n diwylliant, gan ein helpu i ddenu a chadw pobl grefftus, gwella lles a hybu cynhyrchiant. Mae'n brawf bod rhoi pobl yn gyntaf yn cyflawni llwyddiant parhaol.

“Wrth i ni barhau i fuddsoddi mewn technoleg newydd ac ehangu ein gweithrediadau, rydyn ni wedi ymrwymo i greu mwy o swyddi diogel o ansawdd uchel yma yn y Gogledd. Gyda phwysau treth cynyddol, mwy o reoleiddio a phrinder parhaus o weithwyr crefftus, mae'n bwysicach nag erioed bod y llywodraeth yn creu'r amodau i fusnesau ffynnu.

“Rydyn ni’n gwerthfawrogi cefnogaeth y Ceidwadwyr Cymreig a byddwn yn falch o gefnogi eu hymrwymiad i fenter a thwf economaidd yn y cyfnod cyn etholiad nesaf y Senedd ym mis Mai 2026. Mae sector gweithgynhyrchu cryf a chystadleuol yn hanfodol i ffyniant Cymru - gan lywio twf, creu cyfleoedd a chynnal y cymunedau rydyn ni’n falch o fod yn rhan ohonynt.”