Mae Darren Millar AS Gorllewin Clwyd wedi rhybuddio bod oedi ar gyfer triniaethau ysbyty yn y Gogledd yn rhoi straen ychwanegol ar bractisau meddygon teulu ac yn ei gwneud hi'n anoddach i gleifion gael apwyntiadau.
Wrth godi'r mater yn y Senedd yr wythnos hon, galwodd Darren ar Ysgrifennydd Iechyd y Cabinet i gymryd camau i fynd i'r afael â'r problemau.
Meddai:
"Mae gan bob un ohonom y broblem hon yn ein hetholaethau, onid oes, lle mae pobl sy'n ceisio cael yr apwyntiadau hyn yn ei chael hi'n anodd iawn, yn enwedig yn y boreau, ac apwyntiadau ar yr un diwrnod wrth gwrs?
"Ymddengys eu bod yn haws eu cael nag apwyntiadau ymlaen llaw, a cheisio trefnu apwyntiadau ymlaen llaw ar gyfer archwiliadau a phethau eraill lle nad oes cymaint o frys.
"Un o'r heriau y mae meddygon teulu yn dweud wrthyf eu bod yn eu hwynebu, oherwydd yr amseroedd aros hir iawn ar gyfer triniaethau ysbyty, yw eu bod bellach yn gorfod trin mwy o bobl, ac mae hynny'n rhoi mwy o bwysau ar apwyntiadau yn y gymuned.
"A gaf i ofyn i chi am yr wybodaeth ddiweddaraf, yn enwedig ar gyfer gogledd Cymru? Gwyddom fod y ffigurau amseroedd aros yn amheus i fyny yno, ond o ystyried y pwysau ychwanegol yn y gogledd oherwydd yr amseroedd aros hir iawn, pa adnoddau ychwanegol rydych chi'n eu rhoi i'r practisau meddygon teulu hynny fel y gallant ymdopi â'r baich ychwanegol y mae'n ei greu?"
Yn ei ymateb, dywedodd Ysgrifennydd y Cabinet fod Llywodraeth Cymru yn "gweithio gyda'r bwrdd iechyd i sicrhau bod eu perfformiad cyffredinol yn gwella fel rhan o'r trefniadau uwchgyfeirio".
Wrth siarad wedyn, dywedodd Darren:
"Ers blynyddoedd rwyf wedi bod yn galw ar Lywodraeth Cymru i wella mynediad i feddygon teulu, ac eto dyma fi'n dal i gael cysylltiad rheolaidd â chleifion sy'n methu cael apwyntiad gyda'u meddyg.
"Mae bywydau'n cael eu rhoi yn y fantol o ddydd i ddydd. Mae angen mynd i'r afael â'r mater hwn ar fyrder”
Beth am wylio cyfraniad Darren Millar yn Senedd Cymru, isod:
