Gyda'r Samariaid wedi cyhoeddi efallai y bydd 100 o'i ganghennau ar draws y DU ac Iwerddon yn cau, gan gynnwys y gangen yn y Rhyl, mae Darren Millar, yr Aelod o’r Senedd dros Orllewin Clwyd, wedi ysgrifennu at yr elusen yn galw arnyn nhw i ailystyried eu penderfyniad.

Ar hyn o bryd, mae gan Gymru naw cangen y Samariaid ac un 'hyb'; dim ond dwy gangen sydd yn y Gogledd (Y Rhyl a Bangor) ac un yn y Canolbarth (Aberystwyth).

Cangen y Rhyl a’r Gogledd-ddwyrain yw'r lleiaf o'r ddwy gangen yn y Gogledd ac mae'n rhoi cyngor i bobl dros y ffôn.

Mae Darren yn poeni y bydd cau’r gangen yn effeithio ar y gwasanaeth a ddarperir ar hyn o bryd, felly mae'n galw ar y Samariaid i ailystyried eu cynlluniau.

Meddai:

"Roeddwn i'n hynod siomedig o glywed efallai y bydd cangen y Samariaid ar Bedford Street, y Rhyl, yn cau. Mae'r gwirfoddolwyr sy'n gweithio oddi yno ar hyn o bryd yn teimlo eu bod yn cael eu cefnogi mewn ffordd na fydden nhw pe baent yn gweithio gartref.

"Yn ystod y blynyddoedd diwethaf, maen nhw wedi gwneud cynnydd mawr wrth recriwtio gwirfoddolwyr newydd, gyda phob un ohonyn nhw’n teithio i gyfleuster y Gangen, ac rwy’n clywed bod ysbryd cymunedol cryf o fewn y gangen.

"Os oes unrhyw un o'r gwirfoddolwyr yn cael trafferth gydag unrhyw un o'r galwadau maen nhw'n eu hateb, maen nhw'n gallu gofyn i’w cydweithwyr a Chyd-gyfarwyddwyr y Gangen am arweiniad. Ni fydd hyn yn bosibl os byddan nhw'n gweithio gartref. Mae pryderon hefyd ynglŷn â chyfrinachedd galwadau os bydd y gwirfoddolwyr yn gwneud y gwaith o bell.

"Mae'r Samariaid yn elusen wych sy'n achub bywydau bob dydd – gall cau canghennau roi hynny i gyd yn y fantol.

"Felly, rwy'n annog y rhai sy'n gwneud penderfyniadau yn yr elusen i feddwl o ddifrif am eu cynlluniau i gau canghennau, yn enwedig yma yn y Rhyl lle mae'r gwasanaeth yn gweithio cystal  ar hyn o bryd."