Mynychodd Arweinydd y Ceidwadwyr Cymreig ac AS Gorllewin Clwyd, Darren Millar, ddigwyddiad yng Nghaerdydd yr wythnos hon i gofio'r chwe miliwn o Iddewon a lofruddiwyd yn ystod yr Holocost, ochr yn ochr â'r miliynau o bobl eraill a laddwyd o dan erledigaeth y Natsïaid ac mewn hil-laddiadau dilynol yn Cambodia, Rwanda, Bosnia a Darfur.
Roedd Darren yn un o nifer o arweinwyr gwleidyddol yn nigwyddiad coffáu cenedlaethol Cymru ar Ddiwrnod Cofio'r Holocost, a gynhaliwyd ddydd Llun.
Mynychwyd y gwasanaeth ingol hefyd gan arweinwyr crefyddol, yn ogystal â goroeswr yr Holocost, Peter Lantos BEM.
Ymunodd cynrychiolydd o Ymddiriedolaeth Diwrnod Cofio'r Holocost hefyd â llysgenhadon ifanc a soniodd am eu profiadau o'r prosiect Gwersi o Auschwitz sy'n agored i fyfyrwyr 16 i 18 oed.
Wrth siarad wedyn, dywedodd Darren, a drefnodd i Lyfr Ymrwymiad Ymddiriedolaeth Addysgol yr Holocost fod ar gael i ASau lofnodi yn y Senedd:
"Mae'n hanfodol bod y Senedd a chenedl Cymru yn cymryd yr amser i gofio a myfyrio ar erchyllterau'r Holocost a'r holl hil-laddiadau ers hynny, ac mae Diwrnod Cofio'r Holocost yn ein helpu i wneud hynny.
"Roedd y gwasanaeth ddydd Llun yn hynod deimladwy ac roedd hi’n fraint clywed gan oroeswr yr Holocost, Peter Lantos.
"Ganed Peter yn Hwngari ym 1939. Yn haf 1944 cafodd ei alltudio gyda'i rieni i wersyll Bergen-Belsen yn yr Almaen lle bu farw ei dad o newyn. Goroesodd ef a'i fam a chawsant eu rhyddhau gan Fyddin yr Unol Daleithiau y tu allan i Magdeburg a ddaeth yn barth meddiannaeth Sofietaidd yn fuan wedyn.
"Ar ôl sawl mis o ansicrwydd, fe wnaethant ddianc rhag y Rwsiaid, a theithio ar draws Ewrop a oedd wedi'i rhwygo gan ryfel, yn ôl i Hwngari. Roedd llawer o aelodau o'i deulu mawr wedi marw yn yr Holocost.
"Fel y dywedodd Peter 'antisemitism, the hatred of Jews which fuelled the Holocaust, is alive and well everywhere, including this country'.
"Fel y Ceidwadwyr Cymreig, rydyn ni’n sefyll yn gadarn yn erbyn pob math o gasineb. Rydyn ni’n anrhydeddu dioddefwyr yr holocost trwy ailymrwymo i wyliadwriaeth, addysg a gweithredu, fel nad oes unrhyw genhedlaeth yn gorfod wynebu drwg o'r fath eto."
