Wrth ymateb i'r newyddion bod Llywodraeth Cymru wedi cadarnhau buddsoddiad o £33m yn safle Ysbyty Brenhinol Alexandra yn y Rhyl, mae Arweinydd y Ceidwadwyr Cymreig ac AS Gorllewin Clwyd, Darren Millar, wedi dweud fod hyn yn "rhy ychydig, yn rhy hwyr" ac wedi cwestiynu ai addewid gwag arall cyn etholiad ydyw.
Cyhoeddwyd cynlluniau ar gyfer ysbyty gwerth £22m ar safle Ysbyty Brenhinol Alexandra am y tro cyntaf yn ôl yn 2013, ac fe'u cefnogwyd gan Lywodraeth Cymru gydag addewidion y byddai'n agor yn 2016.
Rhoddwyd addewidion cyn etholiad y byddai drysau’r ysbyty’n agor yn 2016, 2017, 2019, a 2021, a thorrwyd pob un.
Gydag etholiad y Senedd ym mis Mai yn prysur agosáu, mae Darren wedi cwestiynu ai ymgais arall i ennill pleidleisiau yw’r cyhoeddiad yr wythnos hon gan Lywodraeth Cymru dan arweiniad Llafur.
Meddai:
"Er y byddwn wrth fy modd yn croesawu'r cyllid a gyhoeddwyd ar gyfer yr ysbyty newydd hwn, o ystyried yr addewidion di-baid ynglŷn â'r datblygiad hwn ers 2013, byddaf yn ei gredu pan fyddaf yn ei weld.
"Pan gyhoeddwyd cynlluniau ar gyfer yr ysbyty hwn am y tro cyntaf 13 mlynedd yn ôl, cynigiwyd cyfleuster 30 gwely, gan gynnwys 18 gwely cleifion mewnol i bobl hŷn â phroblemau iechyd meddwl, ynghyd ag adran pelydr-x, cyfleusterau uwchsain a fferyllfa, ac Uned Mân Anafiadau. Mae cynlluniau heddiw wedi'u lleihau'n sylweddol ac yn cynnwys dim ond 14 gwely.
"Rydw i wedi dweud dro ar ôl tro wrth y Prif Weinidog ac Ysgrifennydd y Cabinet dros Iechyd nad yw hyn yn ddigonol. Mae'r pwysau ar y GIG yn y Gogledd yn llawer mwy nag yr oedd pan gynigiwyd yr ysbyty newydd yn wreiddiol, felly ni fydd y cynlluniau hyn yn gwneud fawr ddim i'w lleddfu. Yn anffodus, mae'r hyn sy'n cael ei addo yn rhy ychydig, yn rhy hwyr."
Ychwanegodd:
"Y gwir amdani yw, mae Llywodraeth Cymru wedi llusgo eu sodlau am 13 mlynedd ac, yn y cyfamser, mae costau adeiladu wedi cynyddu.
"Rydw i wedi bod yn pwyso am ddarparu'r ysbyty hwn yn ei ffurf wreiddiol ers y diwrnod y cyhoeddwyd y cynigion am y tro cyntaf ac rydw i wedi cael gwybod dro ar ôl tro gan y rhai sydd mewn grym ym Mae Caerdydd nad oedd y cyllid ar gael, ond fe wnaethon nhw rywsut ddod o hyd i'r arian i adeiladu ysbytai newydd yn y De yn ystod y cyfnod hwn.
"Cawsant gyfle i leddfu'r pwysau anghynaliadwy yng Nglan Clwyd a rhoi gwasanaeth iechyd i gleifion yn y Gogledd y gallan nhw ddibynnu arno. Yn hytrach, mae pobl y Gogledd wedi cael eu gadael i lawr unwaith eto."
