Mae Darren Millar, Arweinydd y Ceidwadwyr Cymreig ac AS Gorllewin Clwyd, wedi galw ar Lywodraeth Cymru i gymryd camau i fynd i'r afael â'r ôl-groniad o apwyntiadau dilynol yn y Gogledd.

Wrth siarad yng nghyfarfod y Senedd ddoe, dywedodd Darren fod yr ôl-groniad yn bodoli ledled y wlad, ond bod y sefyllfa'n arbennig o ddifrifol yn ardal Bwrdd Iechyd Prifysgol Betsi Cadwaladr.

Galwodd am ddatganiad gan y Gweinidog Iechyd a Gofal Cymdeithasol ar y mater, gan rybuddio bod yr holl aros am yr apwyntiadau dilynol hyn yn rhoi cleifion mewn perygl.

Wrth siarad yn y Siambr, dywedodd:  

"Yn y gogledd yn unig, mae Bwrdd Iechyd Prifysgol Betsi Cadwaladr wedi dweud bod 170,000 o bobl mewn ôl-groniad ar gyfer apwyntiadau dilynol. Fe ddylai llawer o'r rhain gael eu gweld mewn da bryd, oherwydd, wrth gwrs, fe all fod pobl â chyflyrau sy'n dirywio, yn enwedig os oes cyflwr gofal llygaid ganddyn nhw.

“Ac mae Diabetes UK, yr RNIB, ac eraill, wedi rhybuddio bod llawer o bobl yn wynebu niwed na ellir ei adfer i'w golwg o ganlyniad iddyn nhw beidio â chael eu hapwyntiadau dilynol mewn pryd.

“Rwy'n credu, er bod angen canolbwyntio ar yr apwyntiadau cyntaf hynny, o safbwynt dilyniant, oherwydd bod rhestrau aros hir iawn gennym ni drwyddi draw, mae angen i ni fod yn ymwybodol o'r ffaith hefyd fod apwyntiadau dilynol yr un mor bwysig. Felly, fe hoffwn i wybod beth mae Llywodraeth Cymru yn ei wneud i fynd i'r afael â'r mater hwn.”

Wrth siarad ar ôl y cyfarfod, dywedodd Darren:

“Rwy'n falch bod y Trefnydd, Jane Hutt AS, wedi cytuno yn ei hymateb fod apwyntiadau dilynol yn bwysig ond mae'n amlwg nad oes gan Lywodraeth Cymru gynllun i fynd i'r afael â'r mater hwn.”

Beth am wylio cyfraniad Darren Millar yn Senedd Cymru, isod: