Mae AS Gorllewin Clwyd, Darren Millar, wedi croesawu cynlluniau i leihau'r terfyn cyflymder ar ddarn peryglus o ffordd yn ei etholaeth.
Cyhoeddwyd yr wythnos diwethaf bod Cyngor Sir Conwy wedi cynnig Gorchymyn Rheoleiddio Traffig i leihau'r cyflymder ar ddarn 4km o'r A548, rhwng Llanfair Talhaearn a Llangernyw, o 60mya i 40mya.
Bydd y Gorchymyn Rheoleiddio Traffig yn cynnwys y gyffordd beryglus ar Waterloo Hill.
Mae Darren wedi codi'r mater o oryrru ar hyd y darn hwn sawl gwaith dros y blynyddoedd gyda Chyngor Conwy. Mae hefyd wedi trafod y mater gyda'r cyngor cymuned. Ym mis Mai 2024, bu farw David Paul Langford, o Landudno, mewn damwain ar y ffordd. Yn sgil hyn, ysgrifennodd Kate Robertson, crwner cynorthwyol dwyrain a chanol Gogledd Cymru, at Gyngor Bwrdeistref Sirol Conwy ym mis Rhagfyr 2025 - yn dilyn cwest - yn eu hannog i weithredu.
Gan groesawu'r gostyngiad cyflymder arfaethedig, dywedodd Darren:
"Roeddwn i wrth fy modd o glywed bod Cyngor Conwy wedi gwrando ar yr holl bryderon a godwyd ynglŷn â'r darn hwn, ac wedi cynnig Gorchymyn Rheoleiddio Traffig i leihau'r terfyn cyflymder.
"Bu gormod o ddamweiniau ar hyd y darn peryglus hwn o ffordd dros y blynyddoedd, gydag un damwain yn arwain at farwolaeth drychinebus tad ifanc yn 2024.
"Bydd terfyn cyflymder is yn cael ei groesawu'n fawr gan y gymuned leol, ac rwy'n bersonol hefyd yn edrych ymlaen at weld y mesurau diogelwch hyn yn cael eu gweithredu, gan wneud y rhan hon o'r A548 yn fwy diogel i bawb."
