Ar ôl galw dro ar ôl tro dros y blynyddoedd am fesurau diogelwch ar yr A494, mae AS Gorllewin Clwyd, Darren Millar, wedi croesawu'r cyhoeddiad am gyllid ar gyfer gwelliannau ar y darn rhwng Rhuthun a'r Wyddgrug.
Bydd y buddsoddiad a gyhoeddwyd gan Lywodraeth Cymru yn cynnwys gosod arwyddion rhybudd, marciau ffyrdd a physt marcio peryglon newydd.
Byddant yn cael eu gosod ger Gwesty’r Clwyd Gate ar ddarn uchaf y ffordd - lle mae'n troi'n sydyn.
Wrth groesawu'r buddsoddiad, dywedodd Darren:
"Mae'r cyhoeddiad hwn yn un hir ddisgwyliedig. Mae hwn yn ddarn peryglus o’r ffordd ac rydw i wedi bod yn galw am welliannau ers blynyddoedd. Mae'n dda bod Llywodraeth Cymru yn bwriadu buddsoddi rhywfaint o arian o’r diwedd a gwneud y ffordd hon yn fwy diogel.
"Rydyn ni wedi gweld llawer gormod o ddamweiniau a marwolaethau ar yr A494 dros y blynyddoedd, felly bydd trigolion yn croesawu'r gwelliannau hyn, ond mae'n siomedig ein bod ni wedi gorfod aros mor hir.
"Pan gafodd prosiectau ar y ffordd hon eu rhoi o’r neilltu o ganlyniad i'r moratoriwm ar fuddsoddi mewn prosiectau cyfalaf newydd, heriais Lywodraeth Cymru dro ar ôl tro ar ei phenderfyniad a thynnu sylw at y damweiniau a oedd yn digwydd ar y ffordd.
"Bydd yr arwyddion a'r marciau a fydd yn cael eu gosod yn rhybuddio gyrwyr bod pobl yn cerdded, beicio a marchogaeth yn yr ardal ac rwy'n edrych ymlaen yn fawr at eu gweld yn eu lle."
