Ar ôl galw ers amser maith am fesurau diogelwch ar yr A494, mae AS Gorllewin Clwyd, Darren Millar, wedi croesawu'r newyddion bod terfynau cyflymder clustogi yn cael eu cyflwyno ar ddwy ran o'r ffordd.

Rhannau byr o’r ffordd wrth i chi agosáu neu adael terfyn cyflymder 20mya neu 30mya sy'n helpu gyrwyr i arafu yn fwy graddol yw terfynau cyflymder clustogi.

Mae Llywodraeth Cymru wedi cyhoeddi bod terfynau cyflymder clustogi yn cael eu cynnig ar gyfer ochr orllewinol y terfyn 20mya ar yr A494 Llanbedr Dyffryn Clwyd, ac ar gyfer y naill ochr a'r llall i'r terfyn 20mya ar yr A494 Rhuthun.

Wrth groesawu'r cynigion, dywedodd Darren:

"Roeddwn i'n hynod falch o weld y ddwy ran yma o'r A494 yn cael eu cynnwys yn y rhestr yn dilyn adolygiad o derfynau cyflymder 20mya.

"Gall gorfod gostwng eich cyflymder yn gyflym o 60mya i 20mya fod yn beryglus, felly bydd cael terfynau cyflymder clustogi yn y rhannau hyn yn gwneud y ffordd yn llawer mwy diogel.

"Gallai'r cynigion arwain at ran 40mya fer yn cael ei hychwanegu rhwng y 60mya a'r 20mya i sicrhau gostyngiad mwy graddol mewn cyflymder.

"Yn anffodus, rydyn ni wedi gweld nifer o farwolaethau ar yr A494 dros y blynyddoedd, a dyna pam rydw i wedi galw dro ar ôl tro am leihau'r terfyn cyflymder.

"Felly, rwy’n croesawu’r cynigion hyn yn fawr, ond rwy'n siomedig na fydd unrhyw newidiadau ar yr A494 Gwyddelwern gan fod hon hefyd yn ffordd beryglus.

"Byddaf yn parhau i roi pwysau ar Ysgrifennydd y Cabinet dros Drafnidiaeth i sicrhau bod y rhan hon o'r A494 yn elwa ar fesurau diogelwch hefyd.

"Mae'n rhaid i ni wneud popeth o fewn ein gallu i atal unrhyw farwolaethau pellach ar yr A494."