Mae Arweinydd y Ceidwadwyr Cymreig ac AS Gorllewin Clwyd, Darren Millar, wedi croesawu'r cyhoeddiad ddoe gan Lywodraeth Cymru y bydd ymchwiliad lleol cyhoeddus i gynnig Parc Cenedlaethol Glyndŵr.
Mae Llywodraeth Cymru yn bwriadu penodi Penderfyniadau Cynllunio ac Amgylchedd Cymru i gynnal yr ymchwiliad i ystyried y sylwadau a'r gwrthwynebiadau a wnaed mewn cysylltiad â chreu Parc Cenedlaethol Glyndŵr.
Fis Medi'r llynedd, lansiodd Cyfoeth Naturiol Cymru (CNC) gyfnod ymgynghori statudol o 12 wythnos ar y Parc Cenedlaethol arfaethedig, a fydd yn cwmpasu rhannau o gefn gwlad Sir Ddinbych a Gwynedd.
Yn ei ymateb ei hun, dywedodd Darren, sydd bob amser wedi bod o blaid yr egwyddor o sefydlu parc cenedlaethol newydd yn y Gogledd-ddwyrain, na allai gefnogi'r cynigion sydd wedi’u cyflwyno ar hyn o bryd.
Meddai:
"Mae fy nghefnogaeth bob amser wedi bod yn amodol ar ddau beth.
"Yn gyntaf, dylai ffiniau parc cenedlaethol newydd gael eu halinio ag Ardal Harddwch Naturiol Eithriadol presennol Bryniau Clwyd a Dyffryn Dyfrdwy.
"Ac yn ail, yn hytrach na sefydlu Awdurdod Parc Cenedlaethol drud a biwrocrataidd newydd, dylai Llywodraeth Cymru roi'r cyfrifoldeb i gynghorau lleol a chynghorwyr, sy'n uniongyrchol atebol i'r rhai maen nhw'n eu gwasanaethu, am reoli dynodiad y Parc Cenedlaethol, fel sy'n wir ar hyn o bryd am yr AHNE."
Wrth groesawu'r ymchwiliad lleol cyhoeddus, dywedodd:
"O ystyried yr ystod o safbwyntiau a fynegwyd, o blaid ac yn erbyn creu Parc Cenedlaethol newydd, yn ystod y cyfnod ymgynghori, cynnal ymchwiliad cyhoeddus yw’r dull cywir yn fy marn i.
"Mae'r cynnig wedi cael gwrthwynebiadau gan gynghorau sir Wrecsam, Powys a Sir Ddinbych, gyda phryderon am drefniadau cyllido a chynllunio, yn ogystal â'r effaith ar brisiau tai, gwasanaethau lleol a'r Gymraeg yn cael eu codi.
"Mae'n hanfodol bod yr holl safbwyntiau hyn yn cael eu hystyried yn iawn. Fel rydw i wedi’i ddweud erioed, mae'n rhaid i ni sicrhau bod y cynnig ar gyfer parc cenedlaethol newydd yn gweithio gyda’r bobl sy'n byw ac yn gweithio yn y cymunedau hyn, yn hytrach nag yn eu herbyn."
