Cyfarfu AS Gorllewin Clwyd, Darren Millar, â'r Frenhines Bakembisa Kuyalu Mafuta o Weriniaeth Ddemocrataidd Congo yn ystod ei hymweliad diweddar â Bae Colwyn.
Mae gan Fae Colwyn gysylltiad unigryw â Congo sy'n dyddio'n ôl i ddiwedd y 19eg ganrif ac roedd ymweliad y Frenhines ddydd Gwener yn gyfle i gydnabod a thrafod eu hanes cyffredin a sut y gellir adeiladu perthynas rhwng y ddau ymhellach yn y dyfodol.
Ar ôl yr ymweliad, dywedodd Darren:
"Roedd hi’n anrhydedd mawr cwrdd â'r Frenhines Bakembisa a'i gosgordd a'u croesawu i ardal hyfryd y gogledd.
"Mae'r berthynas rhwng Congo a Bae Colwyn yn mynd yn ôl dros 140 mlynedd, pan ymwelodd y Parchedig William Hughes â Chongo ac agor Tŷ'r Congo ym Mae Colwyn, a hyfforddodd Affricaniaid ifanc.
"Dychwelodd llawer o’r myfyrwyr adref fel athrawon, meddygon ac arweinwyr cymunedol, gan greu cysylltiadau parhaol rhwng Cymru a Chongo.
"Roedd cyfarfod yr wythnos diwethaf yn cydnabod ein bod yn rhannu hanes ac y gallwn wneud llawer mwy i'w ddathlu."
Hefyd yn bresennol yn y cyfarfod roedd y Cynghorydd Jones Nuttall, Maer Bae Colwyn, a Dr Sibani Roy, sylfaenydd a chadeirydd Rhwydweithio ar gyfer Ymwybyddiaeth y Byd o Integreiddio Amlddiwylliannol (NWAMI).
Ychwanegodd Darren:
"Mae cydnabod yr hanes cyffredin rhwng Bae Colwyn a Chongo yn ein galluogi i ddathlu'r cysylltiadau sydd wedi bodoli ers cenedlaethau ac i archwilio ffyrdd y gall ein cymunedau barhau i ddysgu oddi wrth ei gilydd.
"Fe wnes i fwynhau'r amser a dreuliais gyda'i Mawrhydi y Frenhines a'r Tywysogesau, ac edrychaf ymlaen at gydweithrediad diwylliannol ac addysgol rhwng Bae Colwyn a Chongo yn y dyfodol."
