Yng Nghwestiynau'r Prif Weinidog heddiw, heriodd Arweinydd y Ceidwadwyr Cymreig y Prif Weinidog ynglŷn â chyflwr GIG Cymru, yn dilyn rhaglen ddiweddar Y Byd ar Bedwar a ddatgelodd fod bron i 89,000 o gleifion wedi cael eu trin mewn coridorau neu ardaloedd eraill anghlinigol yn ysbytai Bwrdd Iechyd Betsi Cadwaladr rhwng 2022 a Hydref 2025.
Ar gyfartaledd, treuliodd cleifion bron i 10 awr ar goridorau yn Ysbyty Glan Clwyd y llynedd, yr adeg hiraf o'r holl ysbytai yn y rhanbarth, tra bod un claf yn Ysbyty Gwynedd yn 2024 wedi aros ar goridor am dros bum diwrnod.
Ailadroddodd Mr Millar alwadau’r Ceidwadwyr Cymreig i ddatgan argyfwng iechyd, er mwyn sbarduno gweithredu ar unwaith ar draws y GIG a mynd i'r afael â'r argyfwng.
Dywedodd Arweinydd y Ceidwadwyr Cymreig, Darren Millar AS:
"Ledled Cymru, mae gofal brys yn dirywio, mae gofal mewn coridorau wedi troi’n norm, ac mae pobl yn cael niwed ac yn marw o ganlyniad.
"Dydy strategaeth Llywodraeth Cymru i fynd i'r afael â'r materion hyn ddim yn gweithio. Mae staff yn anobeithio ac yn teimlo nad oes ganddyn nhw gefnogaeth, tra bod cleifion yn cael eu hamddifadu o'u hurddas ac yn cael eu rhoi mewn perygl.
"Mae'n gywilyddus bod y Prif Weinidog wedi gwrthod ymddiheuro i'r rhai sydd wedi gorfod derbyn gofal mewn coridor, ac mae’n anodd coelio ei bod hi'n parhau i wadu bod ein GIG yng nghanol argyfwng llawn.
"Ni all y Prif Weinidog ddatrys problem y mae hi'n gwrthod cyfaddef sy’n bodoli. Mae'n bryd tynnu'r llinyn a datgan argyfwng iechyd er mwyn cynyddu’r capasiti gwelyau, rhoi terfyn ar y sgandal o ofal mewn coridorau, ac atal cleifion rhag marw'n ddiangen mewn coridorau a chypyrddau yn ein hysbytai ledled Cymru."
Beth am wylio cyfraniad Darren Millar yn Senedd Cymru, isod:
