Mae’r Aelod o’r Senedd dros Orllewin Clwyd, Darren Millar, yn annog rhieni yn Llysfaen i fynychu cyfarfod cyhoeddus sydd wedi'i drefnu ynghylch penderfyniad Cyngor Bwrdeistref Sirol Conwy i roi’r gorau i gludiant o'r cartref i'r ysgol am ddim i ddysgwyr o'r pentref sy'n dymuno cael eu haddysg yn Ysgol Bryn Elian.
Mae Darren o’r farn bod penderfyniad yr awdurdod lleol yn ddiffygiol ac felly mae wedi trefnu cynnal cyfarfod cyhoeddus ar y cyd â Chyngor Cymuned Llysfaen ddydd Iau yma, 15 Awst, am 6:30pm yn Neuadd Bentref Llysfaen, LL29 8SS.
Fis diwethaf disgrifiodd y cynlluniau i gael gwared ar gludiant o'r cartref i'r ysgol fel rhai "cwbl annerbyniol" a dywedodd y byddai'n her sylweddol i deuluoedd lleol.
Yn dilyn cyhoeddi'r toriadau, dywedodd:
"Bydd llawer yn cael trafferth dod o hyd i drefniadau eraill a'u hariannu, yn enwedig o ystyried diffyg capasiti gwasanaethau bysiau lleol.
"Dydy’r llwybr rhwng Llysfaen ac Ysgol Bryn Elian ddim yn un hawdd ac mae'n peri peryglon, yn enwedig mewn tywydd garw ac o ystyried topograffi'r llwybr, a diffyg croesfan i gerddwyr ar Heol Llanelian.
"Er fy mod yn gwerthfawrogi bod yr awdurdod lleol yn gorfod ystyried goblygiadau cyllidebol trefniadau cludiant o'r cartref i'r ysgol, mae'n amlwg bod hwn yn benderfyniad anghywir."
Gan annog pobl i ddod i'r cyfarfod cyhoeddus yr wythnos hon, dywedodd:
"Rydw i wedi estyn gwahoddiad i Gyngor Bwrdeistref Sirol Conwy anfon cynrychiolydd i fynychu'r cyfarfod, gwrando ar bryderon lleol, ac egluro safbwynt yr awdurdod lleol, ac ateb unrhyw gwestiynau a all godi.
"Mae'n bwysig bod rhieni'n lleisio’u barn ac yn mynegi eu pryderon. Mae pŵer pobl wedi gwrthdroi penderfyniadau awdurdodau lleol yn y gorffennol ac rwy'n obeithiol y gallwn, gyda nifer dda ohonom yn bresennol, berswadio Cyngor Sir Conwy i adolygu'r penderfyniad hwn."
