Mae Darren Millar AS Gorllewin Clwyd yn rhwystredig efo ddiffyg cynnydd Cyngor Bwrdeistref Sirol Conwy wrth adolygu ffyrdd 20mya ledled y sir.
Ym mis Medi 2023, cyflwynodd Llywodraeth Cymru y terfyn cyflymder diofyn o 20 mya ar ffyrdd cyfyngedig ledled y wlad.
Yn dilyn adolygiad o'i pholisi, rhoddodd Llywodraeth Cymru fwy o hyblygrwydd i gynghorau adolygu llwybrau penodol, ac mewn rhai rhannau o Gymru, gan gynnwys Wrecsam, mae rhai ffyrdd eisoes wedi dychwelyd yn ôl i fod yn rhai 30mya.
Fodd bynnag, mae trigolion Bwrdeistref Sirol Conwy yn dal i aros.
Er bod y cyngor wedi cyhoeddi ym mis Ionawr ei fod wedi llunio rhestr flaenoriaeth o'r ffyrdd perthnasol a fyddai'n destun asesiad llawn, mae'r cynnydd wedi bod yn araf ers hynny.
Ar ôl i Darren ysgrifennu at yr awdurdod lleol yn gofyn am ddiweddariad ar y sefyllfa, cafodd wybod eu bod nhw wrthi'n cynnal asesiadau technegol ac ymgysylltu â rhanddeiliaid ar hyn o bryd.
Nododd ymateb y Cyngor ymhellach:
"Rydym wedi anfon holiadur at yr holl randdeiliaid perthnasol a thrigolion y rhannau o'r ffyrdd sy'n cael eu hadolygu ar hyn o bryd. Ein bwriad yw cwblhau'r asesiadau technegol ac adolygu'r ymatebion ymgysylltu erbyn dechrau i ganol mis Rhagfyr a phenderfynu ar ba rannau o'r ffyrdd fydd yn destun proses TRO (Gorchymyn Rheoleiddio Traffig).
"Byddwn yn dechrau'r broses TRO ym mis Ionawr 2026. Ni allaf gynnig amserlen ar gyfer y broses TRO ar hyn o bryd gan y byddai hyn yn dibynnu ar nifer y rhannau o’r ffyrdd ac a ddaw unrhyw wrthwynebiadau i law."
Meddai Darren:
"Dwi erioed wedi dod ar draws proses mor hirfaith.
"Fis nesaf, bydd yn flwyddyn ers iddyn nhw gyhoeddi eu bod wedi llunio rhestr flaenoriaeth, ac eto maen nhw'n dal ymhell o wybod pa rannau o’r ffyrdd fydd yn destun proses TRO.
"Mae awdurdodau lleol eraill eisoes wedi adfer llawer o ffyrdd i fod yn rhai 30mya. Os gallan nhw wneud hynny, pam na all Cyngor Bwrdeistref Sirol Conwy?
"Ni ddylai cymaint o'n ffyrdd erioed fod wedi eu pennu'n rhai 20mya yn y lle cyntaf, ac mae pobl yn daer am weld synnwyr cyffredin unwaith eto.
"Rwy'n annog y Cyngor i fwrw ymlaen â'r gwaith hwn."
