Cynnig gofal plant Cymru yw’r gwaethaf ym Mhrydain, ac mae Arweinydd y Ceidwadwyr Cymreig ac AS Gorllewin Clwyd, Darren Millar, wedi erfyn ar y Prif Weinidog i roi'r cymorth i rieni sy'n gweithio gyda chostau’r gofal plant sydd ei angen arnynt.
Wrth siarad yng nghyfarfod y Senedd ddydd Mawrth, dywedodd Darren fod rhieni sy’n gweithio’n galed o Gymru yn symud dros y ffin i Loegr yn fwriadol lle gallant gael cymorth gofal plant am ddim i fabanod o naw mis oed.
Felly gofynnodd i’r Prif Weinidog wella'r cynnig gofal plant yng Nghymru.
Meddai Darren;
“Brif Weinidog, canfu gwaith ymchwil gan Coram Family and Childcare fod rhiant plentyn o dan ddwy oed yng Nghymru yn gwario £4,400 yn fwy y flwyddyn ar gyfartaledd i anfon ei blentyn i feithrinfa yn rhan-amser na thros y ffin yn Lloegr. Mae hynny'n £1,700 yn fwy y flwyddyn na'r sefyllfa yn yr Alban ar hyn o bryd. Nawr, mae hyn oherwydd bod rhieni yng Nghymru yn cael llai o gymorth gyda chostau gofal plant nag unrhyw le arall ym Mhrydain.
“Allwch chi esbonio i ni heddiw, Prif Weinidog, pam nad yw'r Blaid Lafur yng Nghymru yn cefnogi nac yn gwerthfawrogi mamau a thadau sy'n gweithio'n galed trwy roi mynediad iddyn nhw at fwy o gymorth gyda gofal plant am ddim?”
Ar ôl i'r Prif Weinidog geisio tynnu sylw at wahaniaethau rhwng Cymru a Lloegr, ychwanegodd Darren:
“Yn Lloegr, fe allwch chi gael cymorth gofal plant am ddim i fabanod o naw mis oed. Nid ydych chi'n cael y cymorth hwnnw os ydych chi'n byw yng Nghymru. Yng Nghymru, nid yw'r mwyafrif o bobl yn cael unrhyw gymorth ariannol gyda chostau gofal plant nes bod eu plentyn yn dair oed, ac mae'r bwlch ariannol rhwng costau gofal plant yng Nghymru a Lloegr yn debygol o gynyddu'n sylweddol gan eu bod nhw'n mynd i ymestyn y cynnig a dyblu nifer yr oriau am ddim i blant dan dair oed ym mis Medi eleni.
“Derbyniodd eich Llywodraeth Cymru chi £140 miliwn mewn cyllid canlyniadol i'ch caniatáu i ymestyn eich cynnig a'i wneud o leiaf yr un mor gyfartal â'r cynnig dros y ffin yn Lloegr. Beth ydych chi wedi ei wneud gyda'r arian hwnnw, oherwydd mae'n amlwg nad ydych chi wedi ei fuddsoddi mewn gofal plant?”
Ychwanegodd:
“Brif Weinidog, nid wyf i'n falch o'r ffaith bod gennym ni rieni sy'n gweithio o Gymru sy'n symud yn fwriadol i Loegr er mwyn cael cymorth gyda'u cyllid o ran gofal plant. Mae'n anghywir bod rhieni yma yn gorfod talu, ar gyfartaledd, miloedd o bunnoedd yn fwy na thros y ffin. Y gwir yw hyn: rhieni yng Nghymru sydd â'r cyflogau isaf, y costau gofal plant uchaf a'r cynnig gofal plant gwaethaf ym Mhrydain Fawr.”
Wrth siarad ar ôl drafodaeth, dywedodd Darren:
"O dan Lafur, mae rhieni mewn sefyllfa waeth yng Nghymru nag mewn mannau eraill yn y DU ond maen nhw’n wynebu'r costau gofal plant uchaf. Bydd Llywodraeth Geidwadol Cymru yn rhoi mwy o gymorth i rieni sy'n gweithio'n galed fel rhan o'n cynlluniau i drwsio Cymru."
