Gyda Deintyddfa arall yn ei etholaeth yn cyhoeddi y bydd yn terfynu ei darpariaeth GIG, mae AS Gorllewin Clwyd, Darren Millar, wedi ailadrodd ei bryder difrifol ynglŷn â'r argyfwng deintyddol sy'n wynebu Cymru.
Yr wythnos diwethaf, ar 26 Chwefror, hysbyswyd Bwrdd Iechyd Prifysgol Betsi Cadwaladr gan Feddygfa Ddeintyddol Abergele, Groes Lwyd, o'i bwriad i roi'r gorau i ddarparu Gwasanaethau Deintyddol y GIG o 31 Mawrth 2026, penderfyniad a fydd yn effeithio ar 471 o gleifion.
Deallir y bydd y ddeintyddfa yn parhau i ddarparu gwasanaethau deintyddol ar sail breifat.
Yn ystod y blynyddoedd diwethaf, mae Darren wedi gweld nifer dda o ddeintyddfeydd y GIG yn ei etholaeth yn cau, ac mae wedi galw dro ar ôl tro ar Lywodraeth Lafur Cymru i ymateb i'r argyfwng.
Gan gyfeirio at y newyddion ynglŷn â Deintyddfa Abergele, dywedodd:
"Mae'n bryderus iawn bod Gogledd Cymru ar fin colli deintyddfa GIG arall. Mae'r rhanbarth yn prysur ddod yn anialwch deintyddol.
"Rhybuddiwyd Llywodraeth Cymru, oni bai ei bod yn gweithredu i fynd i'r afael â phryderon a godwyd gan y proffesiwn deintyddiaeth am y contract deintyddol newydd ac amhoblogaidd, y byddai llawer o ddeintyddion yng Nghymru yn tynnu'n ôl o ddarparu gwasanaethau'r GIG, ond gwrthododd wrando ac rydyn ni bellach yn cael ein hunain yn y sefyllfa hon.
"Yn ystod y blynyddoedd diwethaf rwyf wedi gweld nifer o ddeintyddfeydd y GIG yn fy etholaeth yn cau ac rwyf wedi galw dro ar ôl tro ar Weinidogion ym Mae Caerdydd i weithredu.
"Maen nhw'n dweud nad oes ganddyn nhw'r arian i fuddsoddi yn neintyddiaeth y GIG, ond y gwir amdani yw, am bob £1 sy'n cael ei wario ar achos deintyddiaeth y GIG yn Lloegr, mae Cymru yn cael £1.20 i'w wario yma.
"Ni ddylai cleifion fod yn gorfod teithio i'r Alban neu dramor i gael triniaeth ddeintyddol, sef yr hyn y mae fy etholwyr yn gorfod ei wneud - mae'n hollol farbaraidd."
Ychwanegodd:
"Mae'n rhaid i ni fynd i'r afael â'r broblem hon unwaith ac am byth. Mae angen cymhellion i bobl hyfforddi yng Nghymru ac mae angen cymhellion i sicrhau eu bod yn gweithio i’r GIG ar ôl iddyn nhw gael eu hyfforddi.
"Ers blynyddoedd rwyf wedi bod yn erfyn ar Lywodraeth Cymru i roi deintyddiaeth yn uchel ar ei rhestr o flaenoriaethau - maen nhw wedi methu â gwneud hynny, a nawr rydyn ni yn y llanast hwn. Mae cleifion yn haeddu cymaint mwy."
