Mae Darren Millar, AS Gorllewin Clwyd ac Arweinydd y Ceidwadwyr Cymreig, wedi cynnal digwyddiad gwobrwyo arbennig yn y Senedd, ar gyfer Cwmni Anrhydeddus Lifrai Cymru.
Daeth Aelodau o'r Senedd, aelodau o'r Cwmni a gwesteion eraill at ei gilydd ddydd Mercher 15 Hydref i glywed mwy am y Cwmni a chydnabod gwaith rhai o'r unigolion dawnus sydd wedi cael cefnogaeth.
Yn ystod y digwyddiad, clywodd y mynychwyr sgyrsiau a chyflwyniadau gan yr artist tirluniau Peter Kettle, y dylunydd ffasiwn Rosario Spezio a'r awdur Adam Hart, a gwnaethant hefyd fwynhau perfformiadau lleisiol gan fyfyrwyr yng Ngholeg Brenhinol Cerdd a Drama Cymru.
Cyflwynwyd gwobrau i sawl unigolyn dawnus hefyd.
Sefydlwyd Cwmni Anrhydeddus Lifrai Cymru ym 1993 fel Urdd Lifrai Cymru, gyda'r nod o hyrwyddo addysg, y celfyddydau, gwyddoniaeth a thechnoleg yng Nghymru.
Yn 2013, ar ôl derbyn Siarter Frenhinol (sef yr unig gwmni y tu allan i Lundain i ddal y statws hwn), rhoddwyd ei enw presennol i'r Cwmni.
Mae'r Cwmni'n rhoi gwerth £40,000 o wobrau ac ysgoloriaethau bob blwyddyn, gan gynnwys ysgoloriaethau teithio, gwobrau galwedigaethol, gwobrau gwella rhifedd a gwobrau teithio cyfreithiol a newyddiaduraeth, gyda'r nod o gefnogi doniau newydd Cymreig.
Mae gwobrau wedi'u cyflwyno i rai mewn ysgolion, prifysgolion, colegau technegol, prentisiaethau a'r lluoedd arfog.
Wrth siarad wedyn, dywedodd Darren:
“Roedd hi'n bleser mawr cynnal y digwyddiad hwn yn y Senedd, a oedd yn anad dim yn ddathliad o ddoniau Cymreig.
“Mae'r Cwmni yn gwneud gwaith gwych o gefnogi doniau newydd, boed trwy gyfleoedd rhwydweithio, hyrwyddo sgiliau ac addysg neu drwy wobrau ariannol.
“Dylai eu gwaith fod yn ysbrydoliaeth wirioneddol i bob un ohonom gadw llygad am ddoniau ifanc, a gwneud yr hyn allwn ni i sicrhau eu bod nhw'n cael y cyfleoedd haeddiannol i ffynnu.
“Edrychaf ymlaen at weld gwaith y Cwmni yn parhau i ffynnu ymhell i'r dyfodol!”
