Mae AS Gorllewin Clwyd, Darren Millar, yn poeni bod tuedd newydd o gynaeafu hawliadau yn effeithio ar denantiaid a landlordiaid yng Nghymru ac mae’n galw ar Lywodraeth Cymru i gymryd camau yn erbyn yr arfer.

Mae cynaeafu hawliadau yn cynnwys cwmnïau trydydd parti, a elwir yn "gynaeafwyr hawliadau" neu’n Gwmnïau Rheoli Hawliadau (CMCs), sy'n targedu tenantiaid yn ddidostur gan eu hannog i wneud hawliadau cyfreithiol yn erbyn eu landlord am atgyweiriadau ac iawndal.

Gan siarad yn y Datganiad Busnes yn y Senedd ddoe, rhybuddiodd Darren fod y duedd, a ddechreuodd yn y dinasoedd mawr, bellach yn dod yn fwy cyffredin ledled Cymru.

Wrth alw am Ddatganiad gan Lywodraeth Cymru ar y mater, dywedodd:

“Fe ddaeth i'm sylw fod tuedd gynyddol o gynaeafu hawliadau yn digwydd yng Nghymru

"Rwy'n bryderus iawn y bydd hyn yn rhoi pwysau pellach eto ar y farchnad dai, sy'n golygu y bydd llai o dai ar gael am brisiau fforddiadwy i'w rhentu.#

"Fe hoffwn i wybod beth mae Llywodraeth Cymru yn ei wneud ynglŷn â'r mater penodol hwn yng Nghymru, i sicrhau ein bod ni'n amddiffyn tenantiaid, ac yn amddiffyn landlordiaid.

Yn ei hymateb, dywedodd y Trefnydd Jane Hutt AS:

“Nid wyf i'n ymwybodol o hyn. Yn amlwg, rydym yn gweithio yn glòs iawn gyda'r sector rhentu preifat a Rhentu Doeth Cymru. Mae hwn yn rhywbeth yr wyf i'n gwybod y bydd gan Ysgrifennydd y Cabinet dros Dai a Llywodraeth Leol ddiddordeb ynddo, o ran unrhyw enghreifftiau sydd gennych chi y gellir eu rhannu nhw.”

Gan siarad ar ôl y cyfarfod, dywedodd Darren:

"Mae Cymru eisoes yn profi argyfwng tai ac os nad yw'r mathau hyn o arferion yn cael eu rheoli, gallent arwain at hyd yn oed lai o eiddo ar gael i'w rentu.

"Mae hon yn broblem ddifrifol y dylai Ysgrifennydd y Cabinet dros Dai fynd i’r afael â hi, ac rwy'n ei hannog i wneud popeth o fewn ei gallu i amddiffyn landlordiaid a thenantiaid rhag yr arfer hwn."

Beth am wylio cyfraniad Darren Millar yn Senedd Cymru, isod: