Cafodd amrywiaeth o gwestiynau eu rhoi gerbron Arweinydd y Ceidwadwyr Cymreig ac AS Gorllewin Clwyd, Darren Millar, pan gymerodd ran mewn sesiwn holi ac ateb ddiweddar ar-lein gyda disgyblion o bob cwr o Gymru.
Cymerodd tua 75 o bobl ifanc o ysgolion uwchradd yng Nghymru ran yn y sesiwn 'Deialog Arweinydd’, gan gynnwys Ysgol Dinas Brân, Llangollen, Ysgol Uwchradd Mary Immaculate, Caerdydd, Ysgol Lewis, Bargoed, ac Ysgol Llanhari, Pont-y-clun.
Mae sesiynau Deialog Arweinydd yn cefnogi dysgwyr ledled Cymru i gael sgyrsiau ystyrlon gydag Arweinwyr Cymreig y pleidiau yn y Senedd.
Mae'r rhaglen yn galluogi dysgwyr i ofyn cwestiynau i arweinwyr pleidiau'r Senedd, gan roi cyfle i bobl ifanc godi materion sy'n bwysig iddyn nhw wrth ddatblygu'r wybodaeth, y sgiliau a'r hyder sydd eu hangen i gymryd rhan yn y broses ddemocrataidd. Mae'r rhaglen yn rhad ac am ddim i ysgolion.
Gofynnodd y bobl ifanc a gymerodd ran yn y sesiwn gyda Darren ddydd Gwener diwethaf gwestiynau ar amrywiaeth o bynciau gan gynnwys y GIG, blaenoriaethau'r Ceidwadwyr Cymreig, mewnfudo, y cyfryngau Cymraeg, iechyd meddwl mewn ysgolion a chymorth ADY, yr amgylchedd, amaethyddiaeth, a diweithdra ymysg pobl ifanc.
Ar ôl y sesiwn, dywedodd Darren:
"Mae bob amser yn bleser ac yn agoriad llygad ymgysylltu â'n pobl ifanc a chlywed eu barn.
"Gofynnwyd rhai cwestiynau diddorol a heriol i mi yn ystod y sesiwn, gan gynnwys y posibilrwydd o waharddiad posibl ar gyfryngau cymdeithasol, ac roedd hi’n dda gweld y bobl ifanc hyn yn ymwneud cymaint â gwleidyddiaeth Cymru a chenedlaethol.
"Mae'n hanfodol ein bod yn rhoi cyfle i'n pobl ifanc fynegi eu safbwyntiau, gan eu bod yn aml yn dod ag atebion newydd i broblemau cymhleth.
"Nhw yw'r dyfodol ac mae'n rhaid i ni bob amser wrando ar yr hyn sydd ganddyn nhw i'w ddweud."
Ychwanegodd:
"Roeddwn i’n ddiolchgar iawn i gael y cyfle hwn drwy'r rhaglen Deialog Arweinydd i ryngweithio ymhellach â phobl ifanc yma yng Nghymru ac edrychaf ymlaen at gymryd rhan mewn sesiynau pellach yn y dyfodol."
