Yn dilyn datgeliad yr wythnos hon fod Cyngor Sir Ddinbych yn talu bron i £2m y flwyddyn ar gostau gofal i un plentyn, mae AS Gorllewin Clwyd, Darren Millar, wedi galw ar Archwilydd Cyffredinol Cymru i ymchwilio i'r mater.
Yng nghyfarfod llawn Cyngor Sir Ddinbych yr wythnos diwethaf, datgelodd y Prif Weithredwr Graham Boase fod un plentyn a ddaeth i ofal y cyngor yn ddiweddar yn costio £35,000 yr wythnos i'r awdurdod; ers hynny, mae'r cyngor wedi cadarnhau mai’r gost wirioneddol yw £37,500 yr wythnos.
Ers cyhoeddi adroddiadau yn y cyfryngau sy'n tynnu sylw at y gwariant gormodol, mae trigolion wedi cysylltu â Darren i fynegi eu pryder bod cymaint yn cael ei wario ar un achos, yn enwedig pan fydd gwasanaethau cyhoeddus yn cael eu torri.
Felly, mae wedi ysgrifennu at yr Archwilydd Cyffredinol, Adrian Crompton, yn ei annog i ymchwilio i'r mater.
Mae ei lythyr yn nodi:
"Mae'r wybodaeth yn yr erthygl yn awgrymu bod costau gofal i blentyn y mae Cyngor Sir Ddinbych yn gyfrifol amdano yn dod i bron i £2m y flwyddyn.
"Ers cyhoeddi'r erthygl, mae nifer o etholwyr pryderus wedi cysylltu â mi sy'n teimlo na ellir cyfiawnhau costau o'r fath a bod angen ymchwiliad allanol.
"O ystyried yr uchod, byddwn yn ddiolchgar iawn pe gallech chi ystyried cynnal adolygiad o'r gwariant hwn i benderfynu a yw'n cynrychioli gwerth am arian i drethdalwyr Cymru."
Meddai Darren:
"Rydyn ni'n gweld gwasanaethau yn Sir Ddinbych yn cael eu torri ym mhobman, felly nid wy’n synnu bod y gwariant syfrdanol hwn ar un plentyn yn unig yn drysu trigolion.
"Er fy mod i’n gwerthfawrogi bod yna blant ag anghenion arbennig iawn sy'n gofyn am ofal 24/7, ac nid wyf yn dweud na ddylen nhw fod yn cael yr help hwn, pan fyddwch chi'n sôn am ffigurau sy’n dod i bron i £2m y flwyddyn, mae gan bobl yr hawl i fod eisiau gwybod pam ei fod yn costio cymaint.
"Rwyf felly wedi gofyn i'r Archwilydd Cyffredinol ymchwilio i'r mater a gobeithio y gall roi'r atebion i'n cwestiynau.
"Mae hwn yn swm llawer rhy uchel ac, o ystyried trafferthion ariannol y cyngor, sydd wedi arwain at dorri gwasanaethau hanfodol, mae'n iawn i ni gael tryloywder llwyr ynglŷn â'r gwariant hwn.
"Edrychaf ymlaen at gael ymateb gan yr Archwilydd Cyffredinol."
