Mae’r Ceidwadwyr Cymreig wedi cyhuddo Llafur Cymru o ragrith ar ôl i weinidogion Llafur yn San Steffan gael eu gorfodi i wanhau newidiadau dadleuol i'r dreth etifeddiaeth sy'n effeithio ar ffermydd, newidiadau yr oedd Aelodau Seneddol Llafur Cymru wedi eu cefnogi'n llawn o'r blaen.
Ar ôl misoedd o bwysau parhaus gan ffermwyr, undebau’r ffermwyr a busnesau gwledig, ochr yn ochr â gwrthwynebiad cyson gan Aelodau Seneddol ac Aelodau o'r Senedd y Ceidwadwyr, mae Llywodraeth y DU wedi cael ei gorfodi i godi'r trothwy treth etifeddiaeth ar dir amaethyddol o £1 miliwn i £2.5 miliwn.
Mae Aelodau Seneddol Llafur Cymru, a bleidleisiodd yn ddiweddar yn erbyn ymdrechion y Ceidwadwyr i ddileu'r polisi yn gyfan gwbl, bellach yn croesawu cyfaddawd rhannol y Llywodraeth ac mae'r Ceidwadwyr Cymreig wedi condemnio eu newid barn fel cam sinigaidd a ffuantus.
Dywedodd Samuel Kurtz AS, Ysgrifennydd Cabinet yr Wrthblaid y Ceidwadwyr Cymreig dros Faterion Gwledig:
"Gadewch i ni fod yn glir: pwysau di-baid gan ffermwyr, undebau’r ffermwyr a chymunedau gwledig a oedd yn sefyll gyda'i gilydd a arweiniodd at y newidiadau hyn. Roedd Aelodau Seneddol ac Aelodau o’r Senedd y Ceidwadwyr yn falch o sefyll ochr yn ochr â nhw yn eu brwydr dros degwch.
"Fe wnaeth Aelodau Seneddol Llafur Cymru gefnogi’r cyrch treth hwn pan oedd yn y fantol a hyd yn oed bleidleisio yn erbyn ymdrechion i'w ddileu’n gyfan gwbl. Ni fydd ffermwyr ledled Cymru yn anghofio hynny. Mae'n hynod ragrithiol iddyn nhw nawr groesawu newidiadau roedden nhw’n eu gwrthwynebu.
"Mae'n gywilyddus bod Llafur Cymru yn ceisio cymryd y clod am ddiwygiadau roedden nhw’n eu gwrthwynebu, sydd beth bynnag yn gamau rhy ychydig a rhy hwyr i lawer o ffermydd teuluol."
Ychwanegodd Mr Kurtz, er bod y trothwy uwch yn cael ei groesawu, y bydd llawer o ffermydd yn dal i gael eu cosbi gan y dreth, yn enwedig mewn ardaloedd lle mae gwerthoedd tir yn uchel ond lle mae elw yn parhau i fod yn dynn.
"Nid yw'r frwydr hon drosodd. Bydd y Ceidwadwyr Cymreig yn parhau i bwyso am ddileu'r dreth niweidiol hon yn llawn. Mae angen ffrind ar ffermwyr, a bydd y Ceidwadwyr Cymreig yno iddyn nhw bob amser."
Meddai AS Gorllewin Clwyd, Darren Millar:
"Mae ffermwyr yn y Gogledd wedi wynebu mwy na blwyddyn o ansicrwydd gan fod Llafur Cymru wedi dewis teyrngarwch plaid yn hytrach na sefyll i fyny dros Gymru wledig. Bydd y Ceidwadwyr Cymreig bob amser yn cefnogi ffermydd teuluol."
