Roedd llawer o bobl yn bresennol mewn cyfarfod cyhoeddus a gynhaliwyd yr wythnos diwethaf i drafod pryderon am effaith busnes trosglwyddo gwastraff sy'n gweithredu yn Chwarel Plas Gwilym, Hen Golwyn, er iddo gael ei drefnu ar fyr rybudd.
Cynhaliodd AS Gorllewin Clwyd, Darren Millar, y cyfarfod ar ôl i gais cynllunio gael ei gyflwyno i ymestyn yr ardal weithredu o fewn y safle. Ers hynny, mae wedi cyflwyno ymateb i'r cais yn amlinellu pryderon trigolion, ac roedd yn falch bod cymaint wedi dod i'r cyfarfod ddydd Gwener diwethaf yn Eglwys yr Ŵyl, Hen Golwyn, i roi eu barn i’r rheoleiddiwr, Cyfoeth Naturiol Cymru, a gweithredwr y safle Jennings, y ddau wedi’u cynrychioli yn y cyfarfod.
Mae trigolion yn Craig Road, Llysfaen Road, Miners Lane, Peulwys Lane a'r ardaloedd cyfagos wedi bod yn codi cwynion ers misoedd am effaith llwch, sŵn a thraffig i'r safle ac oddi yno, ac wedi mynegi pryderon y gallai pethau waethygu pe bai'r gweithrediadau'n cael eu hymestyn.
Wrth wneud sylwadau ar ôl y cyfarfod, dywedodd Darren:
"Cafodd y cyfarfod hwn ei alw ar fyr rybudd, felly roeddwn i'n falch o weld cymaint o bobl yn bresennol. Mae'n dangos cryfder y teimlad am y gweithrediadau presennol a’r cynlluniau ar gyfer y safle yn y dyfodol.
"Roeddwn i'n ddiolchgar fy mod wedi cael y cyfle i gwrdd â gweithredwr y safle ac asiantaethau rheoleiddio ychydig wythnosau yn ôl i drafod pryderon lleol, ac roeddwn i’n falch iawn eu bod hefyd wedi gallu mynychu'r cyfarfod ddydd Gwener diwethaf i glywed yn uniongyrchol gan drigolion ac ateb eu cwestiynau.
"Er y cydnabyddir bod y gweithredwyr yn cymryd camau i liniaru'r effaith uniongyrchol, mae'n amlwg nad yw'r ymdrechion hyn wedi bod yn ddigonol i atal effaith niweidiol ar ansawdd bywyd trigolion.
"Rwyf bellach wedi ysgrifennu at yr awdurdod lleol i nodi barn y trigolion fel rhan o'r broses gynllunio."
"Rwyf am ddiolch i bawb a fynychodd y cyfarfod ac am eu sicrhau unwaith eto fy mod i'n gwneud popeth o fewn fy ngallu i sicrhau bod eu pryderon yn cael eu clywed."
Dywedodd y Cynghorydd Lleol Cheryl Carlisle:
"Roedd yn dda gweld cymaint o drigolion yn bresennol yn y cyfarfod ac yn lleisio’u barn. Hoffwn ddiolch iddyn nhw’i gyd am ddod ar fyr rybudd a hefyd i CNC a Jennings am wrando ar eu pryderon.
"Rwyf am annog yr holl drigolion sydd â diddordeb yn y mater hwn i gyflwyno eu sylwadau eu hunain i'r Adran Gynllunio."
Gall trigolion fynegi eu barn yn uniongyrchol i'r awdurdod lleol yn ysgrifenedig drwy e-bostio [email protected] erbyn 1 Awst 2025 gan ddyfynnu’r rhif cais cynllunio 0/52629.
