Fel eiriolwr brwd dros blant a theuluoedd y lluoedd arfog yng Nghymru, mae AS Gorllewin Clwyd, Darren Millar, wedi croesawu'r newyddion y bydd mwy o blant a phobl ifanc o'r Lluoedd Arfog a theuluoedd cyn-filwyr yn gallu cael gafael ar help.
Mae Llywodraeth Cymru wedi cyhoeddi ei bod yn ehangu'r diffiniad o'r term 'plentyn milwr' a ddefnyddir i benderfynu ar gymhwyster i gael cymorth.
Bydd y newidiadau hyn yn golygu y gall mwy o blant a phobl ifanc o'r Lluoedd Arfog a theuluoedd cyn-filwyr gael gafael ar gymorth o'r mis hwn ymlaen.
Fel sylfaenydd a chyn-Gadeirydd y Grŵp Trawsbleidiol ar y Lluoedd Arfog a’r Cadetiaid, mae Darren wedi bod yn ymgyrchu dros y newid ers tro byd.
Meddai:
"Rwy'n falch iawn ein bod ni’n symud i'r cyfeiriad iawn o’r diwedd, ar ôl blynyddoedd lawer o alw am fwy o gymorth i blant a phobl ifanc milwyr.
"Trwy gydol fy 15 mlynedd fel Cadeirydd Grŵp Trawsbleidiol y Senedd ar y Lluoedd Arfog a'r Cadetiaid, roeddwn i’n mynd ati’n weithredol i mynd i'r afael â'r heriau sy'n wynebu plant personél y lluoedd arfog, yn enwedig o ran parhad addysgol a gofal bugeiliol pan fydd teuluoedd yn symud.
"Mae'n gallu bod yn hynod heriol i blant a phobl ifanc milwyr sy’n gorfod ailadeiladu eu bywydau bob tro mae’r teulu’n symud.
"Mae'n rhaid iddyn nhw aberthu eu sefydlogrwydd fel y gall eraill deimlo'n ddiogel, felly mae ond yn deg ein bod ni'n eu had-dalu trwy ddarparu'r cymorth sydd ei angen arnyn nhw ac y maen nhw’n ei haeddu."
Ar hyn o bryd, darperir cymorth Llywodraeth Cymru yn bennaf trwy Cefnogi Plant Milwyr mewn Addysg (SSCE) Cymru. Fodd bynnag, ar ôl ymgysylltu â rhanddeiliaid gan gynnwys SSCE Cymru, CLlLC, Ffederasiynau Teuluoedd y Lluoedd Arfog, a Thîm Cyfamod y Weinyddiaeth Amddiffyn, mae Ysgrifennydd y Cabinet dros Addysg wedi cytuno i ehangu'r diffiniad o blentyn milwr.
O'r mis hwn:
· bydd plant cyn-filwyr yn gymwys i gael cymorth am hyd at chwe blynedd ar ôl i'w rhiant adael y lluoedd arfog (cynnydd o’r ddwy flynedd bresennol), gan sicrhau bod Cymru yn cyd-fynd â'r diffiniad a ddefnyddir yn Lloegr; a
· bydd cymhwystra yn ymestyn i bobl ifanc hyd at 18 oed, gan adlewyrchu dyletswydd Cyfamod y Lluoedd Arfog.
Mae'r newidiadau hyn yn sicrhau mwy o gydraddoldeb ledled y DU, yn cynyddu eglurder i deuluoedd sy'n symud rhwng cenhedloedd ac yn adlewyrchu'n well yr effaith barhaus y gall bywyd yn y lluoedd arfog ei chael ar blant a phobl ifanc.
