Roedd AS Gorllewin Clwyd, Darren Millar, yn falch o agor ardal offer chwarae newydd yn swyddogol ar Gae Chwarae Llanarmon dros y penwythnos, gan nodi carreg filltir bwysig mewn ymdrechion lleol i wella cyfleusterau hamdden i deuluoedd.

Roedd gosod yr offer newydd, sy'n cynnwys sleidiau, siglenni a fframiau dringo, yn bosibl diolch i grant y Loteri Genedlaethol o £91,805 a ddyfarnwyd i Gyngor Cymuned Llanarmon-yn-iâl.

Dechreuodd y gwaith o osod yr offer newydd ar 1 Medi  ac roedd Darren yn falch iawn o ymweld â’r cyfleusterau newydd a’u hagor yn swyddogol ddydd Sadwrn.

Meddai:

"Roedd hwn yn achlysur arwyddocaol i'r pentref, ac roeddwn i'n falch o fod yn rhan ohono. Roedd hi’n anrhydedd cael cynnig cymryd rhan yn agoriad swyddogol y cyfleusterau newydd trawiadol hyn ac i ymuno yn y dathliadau, yn enwedig o ystyried fy mod wedi cymryd rhan yn agoriad Parc Sglefrfyrddio a Sglefrolio'r pentref tua 10 mlynedd yn ôl.

"Mae'r gofod hwn wedi'i greu gyda chynhwysiant a hwyl mewn golwg ac roedd hi’n wych gweld cymaint o deuluoedd lleol yn dod at ei gilydd i ddathlu'r agoriad ac i fwynhau'r Diwrnod Hwyl yr oedd y cyngor wedi'i drefnu gydag amrywiaeth o weithgareddau a lluniaeth.

"Mae ardaloedd chwarae yn hanfodol o ran lles ein pobl ifanc, ac maen nhw’n hyrwyddo gweithgarwch corfforol, creadigrwydd a chysylltiadau cymdeithasol cryf ymhlith teuluoedd.

"Bydd yr offer chwarae newydd hwn yn dod â llawenydd i blant Llanarmon-yn-iâl am flynyddoedd lawer i ddod, ac rwy'n diolch i'r Cyngor Cymuned, Norma Wright, clerc y cyngor, a Chronfa Gymunedol y Loteri Genedlaethol am wneud hyn yn bosibl."

Meddai’r Cynghorydd Terry Mendies, a fynychodd yr agoriad swyddogol a'r Diwrnod Hwyl:

"Roedd hi’n bleser llwyr mynychu'r agoriad a gweld y plant yn mwynhau'r offer newydd.

"Diolch i'r Cyngor Cymuned am eu holl ymdrechion i sicrhau'r grant hwn gan y Loteri Genedlaethol.

"Bydd y buddsoddiad hwn yn ein cymuned leol yn helpu teuluoedd i dreulio amser gyda'i gilydd ac yn creu ymdeimlad parhaol o falchder yn ein cymuned."