Mae Arweinydd y Ceidwadwyr Cymreig ac AS Gorllewin Clwyd, Darren Millar, yn annog Cyngor Sir Ddinbych i dynnu cynigion i gau Gofal Iechyd Cefndy yn y Rhyl yn ôl.
Cyhoeddodd Cyngor Sir Ddinbych ddoe (dydd Mawrth) fod dyfodol y fenter, sy'n cyflogi llawer o bobl anabl, yn cael ei adolygu.
Cafodd gweithwyr y ganolfan wybod yn y bore, ac yn y prynhawn cynhaliwyd gweithdy lle rhoddwyd cyflwyniad i aelodau Cyngor Sir Ddinbych ar hyfywedd y ganolfan yn y dyfodol (a elwid gynt yn Mentrau Cefndy).
O fewn oriau i'r cyhoeddiad, roedd nifer o weithwyr anabl pryderus eisoes wedi cysylltu â Darren.
Meddai Darren:
"Roeddwn i'n bryderus iawn o glywed bod dyfodol Gofal Iechyd Cefndy yn cael ei adolygu.
"Mae'r fenter hon yn cyflogi llawer o bobl anabl, gan roi urddas gwaith iddyn nhw a'u helpu i hyrwyddo a chynnal eu hannibyniaeth.
"Mae nifer o bobl anabl sy'n gweithio yno eisoes wedi cysylltu â mi ac maen nhw’n poeni’n fawr am eu rhagolygon cyflogaeth yn y dyfodol, ac rwy'n siŵr y bydd fy nghydweithwyr a minnau yn clywed gan fwy yn y dyddiau nesaf.
"Mae'r ganolfan hon yn achubiaeth go iawn i'r bobl anabl ac eraill sy'n gweithio yno, gan roi ymdeimlad gwirioneddol o bwrpas iddyn nhw. Mae'n fwy na dim ond cyflogaeth, mae'n lle sy'n trawsnewid bywyd; rhaid i'r cyngor ystyried hynny o ddifrif cyn gwneud penderfyniad byrbwyll.
"Rwy'n erfyn arnyn nhw felly i dynnu'r cynigion hyn yn ôl a chymryd yr amser i ystyried pob opsiwn amgen a allai ddiogelu'r cyfleoedd cyflogaeth hanfodol hyn i bobl anabl lleol."
Dywedodd Arweinydd y Grŵp Ceidwadol ar Gyngor Sir Ddinbych, y Cynghorydd Brian Jones, a fynychodd y gweithdy ddoe ac a heriodd swyddogion ynglŷn â'r cau:
"Unwaith eto, mae'r cyngor yn cynhyrfu’r dyfroedd go iawn gyda ni ar y meinciau cefn ychydig wythnosau yn unig cyn i benderfyniad gael ei wneud, gan adael bron dim amser i ni archwilio opsiynau hyfyw ar gyfer cadw'r ganolfan hanfodol hon ar agor.
"Mae disgwyl i’r cynnig hwn fynd gerbron Cabinet Sir Ddinbych ar 23 Medi, sydd dim ond tair wythnos i ffwrdd! Ni ddylid rhuthro penderfyniadau fel hyn, yn enwedig pan fo bywoliaeth a llesiant gweithwyr agored i niwed yn y fantol."
