Ymunodd Arweinydd y Ceidwadwyr Cymreig ac AS Gorllewin Clwyd, Darren Millar, â staff a gwirfoddolwyr o Gymorth Canser Macmillan yng Nghymru yn y Senedd yr wythnos hon i nodi digwyddiad codi arian blynyddol yr elusen, sef y Bore Coffi, ac mae'n annog pobl i gymryd rhan yn y digwyddiad codi arian eleni.
Roedd y digwyddiad yn gyfle i glywed mwy am sut mae Macmillan yng Nghymru yn cefnogi pobl sy'n byw gyda chanser, yn ogystal â chwrdd â gwirfoddolwyr, codwyr arian a gweithwyr proffesiynol ysbrydoledig Macmillan.
Ar ôl y digwyddiad, dywedodd Darren:
"Heddiw, (dydd Gwener 26 Medi) bydd pobl yn dod at ei gilydd ledled y wlad ar gyfer bore coffi Cymorth Canser Macmillan. Mae'r digwyddiadau hyn nid yn unig yn dod â phobl at ei gilydd i rannu bwyd a diod blasus, ond maen nhw hefyd yn codi arian gefnogi pobl sy'n byw gyda chanser.
"Dros y blynyddoedd, rydw i wedi bod i lawer o ddigwyddiadau Bore Coffi Macmillan mewn gwahanol leoliadau yn fy etholaeth yng Ngorllewin Clwyd ac yng Nghaerdydd. Mae'n ffordd wych o ddod at ein gilydd, rhannu sleisen o gacen a phaned a chodi arian ar gyfer elusen - ac wrth gwrs mae 2025 yn flwyddyn arbennig wrth i’r elusen ddathlu ei phen-blwydd yn 35 oed!
"Rwy'n falch o helpu i gefnogi bore coffi Macmillan trwy roi gwybod i bobl am y digwyddiad codi arian pwysig hwn a'u hatgoffa nad oes rhaid i foreau coffi gael eu cynnal ar 26 Medi - gallant ddigwydd pryd bynnag y dymunwch, felly nid yw'n rhy hwyr i gymryd rhan.
"Cofrestrwch nawr yn www.macmillan.org.uk/coffee i gynnal Bore Coffi Macmillan ar unrhyw ddiwrnod sy'n addas i chi a helpu mwy o bobl â chanser i gael y gofal gorau sydd gan y DU i'w gynnig.
Mae pob ceiniog a godir mewn Bore Coffi yn helpu Macmillan i ddarparu cefnogaeth i bobl â chanser, sydd ei angen nawr yn fwy nag erioed.
· Gallai £30 helpu i redeg ein fforwm Cymunedol Ar-lein am 1 awr. Yn y cyfnod hwn, gall 80 o bobl sy'n cael eu heffeithio gan ganser yn y DU roi cefnogaeth emosiynol ac ymarferol i'w gilydd ar unrhyw beth sy'n ymwneud â chanser – o driniaethau, i ymdopi â bywyd bob dydd, i farwolaeth anwylyd.
· Gallai £65 dalu am 100 copi o The Cancer Guide. Gall y llyfryn Macmillan hwn helpu rhywun sydd wedi cael diagnosis o ganser yn ddiweddar, a'i deulu, i ddeall mwy am ganser, ei driniaeth a'r help sydd ar gael.
· Gallai £147 dalu am Gynorthwyydd Gwybodaeth a Chymorth Macmillan am 1 diwrnod, gan roi cyfle i bobl sy'n byw gyda chanser ofyn cwestiynau a thrafod eu pryderon.
